გერონტი ქიქოძის სახელობის პრემია

გამოცხადდა კონკურსი გერონტი ქიქოძის სახელობის პრემიის მოსაპოვებლად. განაცხადები მიიღება 2025 წლის 27 იანვრიდან 10 თებერვლამდე.

გერონტი ქიქოძის სახელობის პრემია დააარსა გამომცემლობა აგორამ 2019 წელს. 2023 წლამდე იგი ყოველწლიურად გადაეცემოდა ფრანგულენოვანი რომანის საუკეთესო თარგმანს. 2024 წლიდან გერონტი ქიქოძის პრემია ყოველწლიურად გადაეცემა ფრანგულენოვანი ნაწარმოების (რომანის, მოთხრობების კრებულის, ესეის, დოკუმენტური პროზის, პოეზიის, პიესის) საუკეთესო ქართულ თარგმანს. 2021 წლიდან პერიოდულად გაიცემა პრემია მთარგმნელობით საქმიანობაში შეტანილი ღვაწლისთვის. 2025 წელს გერონტი ქიქოძის პრემიას დაემატა ახალი ნომინაცია: გერონტი ქიქოძე - მოსწავლეების რჩეული.

გერონტი ქიქოძის სახელობის პრემიის კონკურსი ტარდება საქართველოში საფრანგეთის საელჩოსა და საქართველოს ფრანგული კულტურის ცენტრთან პარტნიორობით.

გერონტი ქიქოძის სახელობის პრემია გაიცემა სამ ნომინაციაში:

- ფრანგულენოვანი ნაწარმოების საუკეთესო თარგმანისთვის (ყოველწლიური)

- გერონტი ქიქოძე - მოსწავლეების რჩეული (ყოველწლიური)

- მთარგმნელობით საქმიანობაში შეტანილი ღვაწლისთვის (პერიოდულად)

ფრანგულენოვანი ნაწარმოების საუკეთესო თარგმანის გამოსავლენი ჟიური შედგება ფრანგული ენისა და ლიტერატურის სპეციალისტებისგან, ლიტერატურის მენეჯერებისგან და არის კონფიდენციალური.

ლაურეატის გამოსავლენად ჟიური ხელმძღვანელობს შემდეგი კრიტერიუმებით:
- თარგმანის ხარისხი: რამდენად კარგად ფლობს მთარგმნელი ქართულ და ფრანგულ ენებს, რამდენად ადეკვატურად გადმოაქვს აზრი, რამდენად ინარჩუნებს ენის რეგისტრს, მწერლის სტილს და სხვ.
- რამდენად ხელს შეუწყობს ეს თარგმანი ქართული სალიტერატურო ენის განვითარებას.

კონკურსში მონაწილეობის პირობები:
- ნაწარმოების ორიგინალი დაწერილი უნდა იყოს ფრანგულ ენაზე, ავტორი უნდა იყოს ფრანგი ან ფრანგულენოვანი ქვეყნის წარმომადგენელი;
- ნაწარმოები თარგმნილი უნდა იყოს ფრანგული ენიდან;
- ქართული გამომცემლობა უნდა ფლობდეს ნაწარმოების ქართულ ენაზე გამოცემის საავტორო უფლებას, თუ მწერალი ცოცხალია ან მისი გარდაცვალებიდან არ არის გასული 70 წელი;
- ნაწარმოების ქართული თარგმანი ბეჭდური სახით გამოცემული უნდა იყოს კონკურსის გამოცხადების წინა წელს;
- ნაწარმოების ქართული თარგმანი კონკურსზე უნდა წარადგინოს გამომცემლობამ ან მთარგმნელმა. განაცხადი უნდა შეივსოს გამომცემლობა აგორას საიტზე (http://agorabooks.ge/ka/award), ხოლო წიგნის ორი ეგზემპლარი მიაწოდონ ქ-ნ ნანა ლალიაშვილს, საქართველოს ფრანგული ინსტიტუტის მედიათეკაში მისამართზე: ლადო გუდიაშვილის ქ.7, გთხოვთ მედიათეკაში წიგნების მიტანა წინასწარ შეათანხმოთ ტელეფონით 2923304.
- განაცხადებების რაოდენობა შეზღუდული არ არის.
- გერონტი ქიქოძის სახელობის პრემიის ლაურეატი გამოცხადდება 2025 წლის მარტის ბოლოს.
- პრემია წარმოადგენს 1000 ლარს. იგი გადაეცემა მთარგმნელს.

გერონტი ქიქოძე - მოსწავლეების რჩეული

კონკურსი ტარდება 23-ე საჯარო სკოლის მოსწავლეების მონაწილეობით, რომლებიც გერონტი ქიქოძის სახელობის პრემიის ძირითადი ჟიურის პარალელურად წაიკითხავენ მოკლე სიაში შესულ ნაწარმოებებს, მოაწყობენ შეხვედრებს მთარგმნელებთან და გამოავლენენ ლაურეატს 2025 წლის მაისის ბოლოს. გამარჯვებული გამოცხადდება თბილისის წიგნის საერთაშორისო ფესტივალზე. პრემია წარმოადგენს 1000 ლარს და იგი გადაეცემა მთარგმნელს.

გერონტი ქიქოძის პრემია მთარგმნელობით საქმეში შეტანილი ღვაწლისთვის

პრემია გაიცემა პერიოდულად და წარმოადგენს 1000 ლარს. ლაურეატს ასახელებს თავად გამომცემლობა აგორა.

გამომცემლობა აგორა გისურვებთ წარმატებას!